美好年華

12月20日晚，屋企嘈得好勁，成地玻璃碎，過程唔想喺度提。

12月23日，我地去咗阿Gar（我Senior同事）屋企打邊爐。記得上年嘅今日，我先第一次飲醉。當然，直到今日，我認為我都係唔鍾意飲酒嘅。呢一次，我同同事都飲咗一啲，開開心心解放晒工作壓力。原來冬菇打邊爐，再加wasabi係咁好食，今晚打邊爐雖然唔係食得好多野，但係叫做最好食嘅一次。不過下一日要準時返工，成半夜三點幾四點先返到屋企。

12月24日，10點正要返到公司，但11點幾就要準備走，去馬鞍山白石燒嘢食。不過我其實我BBQ果陣唔係太開心，因為我知屋企人又嘈交，不過，可以散散心都係好事。夜晚係平安夜，留低陪我屋企人過。

12月25日晚，我覺得自己打完個乞嗤個肺好痛，夜晚阿媽陪我去咗急症。我身體一向都唔算係特別多病嘅，呢次係我第一次照X光、做心電圖同埋驗血。雖然我唔覺得痛，但每一次見到啲病人瞓咗喺病床送入醫院，就覺得非常唔好過，知道第日屋企人同埋自己都會老，到時多病一定好難過。我同阿媽由夜晚10點，一路睇醫生同埋等候嘅時間，直到早上6點先走得。醫生話骨無事，可能係肌肉傷咗啦。

12月27日，第一次去遊行，主題係「振興足球，港府有責」，人數廿人左右，人數唔多但一班有心人總算係做咗一樣自己覺得應該做嘅事。

12月28日，下晝去咗食sushi，行咗陣，無見成年，反而覺得你似舊陣時好多年前多啲。唔知係咪因為而家大家都放假，你都無咁忙，個人都正常啲呢？其實呢一日我真係過得好開心，多謝你。